Hanne Krogh Sundbø () er ein norsk songar og tekstforfattar oppvaksen i Haugesund.
Hanne Krogh er ein av dei mestseljande artistane i Noreg gjennom tidene, med over to millionar selte album i heimlandet. Ho spelte hovudrolla som Sonja i ein av dei mest sette norske filmane, Reisen til Julestjernen i 1976. Krogh har vunne fleire spellemannsprisar. I 1985 vann ho og Elisabeth Andreassen songkonkurransen Eurovision Song Contest med songen «La det swinge». Etter dette vart duoen utnemnd til Årets Peer Gynt av Stortinget.
Debuten
Krogh platedebuterte som 14-åring i 1970 med singlen «Lukk opp min dør», etter å ha prøvesunge for Arne Bendiksen. Året etter vann ho den norske Melodi Grand Prix-finalen med melodien «Lykken er», og representerte Noreg i den internasjonale finalen i Irland. Ho opptredde i TV-show i Tyskland og rundt om i Norden, og spelte inn «Lykken er» på både norsk, svensk og tysk. Etter fleire plateutgjevingar valde ho å trekkje seg bort frå platebransjen nokre år, og ho søkte seg inn på Nissen gymnas der ho tok skodespelarutdanning. Dette førte til hovudrollene i spelefilmane Crash og ikkje minst rolla som Sonja i klassikaren Reisen til Julestjernen. Filmen blir enno sett opp på norske kinoar kvart år ved joletider.
Haustvise
I 1978 vart ho lokka tilbake til platestudioet, og gav ut LP-en sin, Hanne Krogh, same året. Året etter vart ho spurt om å gjere ein norsk versjon av den finske songen «Höstvisa» av Erno Tauro, som ho sjølv omsette til norsk. Denne fekk eit godt mottak, med topp-plassering på Norsktoppen og han vart den mest ynskte songen i radioprogrammet Ønskekonserten. Dermed var comebacket eit faktum og dei påfølgjande åra spelte ho inn fleire LP-plater som alle vart heidra med sylv- og gullplate-trofé. I 1984 samla ho sine personlege jolefavorittar som ho gav ut på LP-en Julens vakreste. Han har sidan utgjevinga selt 350 000 eksemplar og er enno i handelen.
Bobbysocks
I 1984 tok ho kontakt med norsk-svenske Elisabeth Andreassen og saman danna dei duoen Bobbysocks. Dei gav ut den første LP-en sin same året, som bestod av swing-låtar med harmonisong, og dessutan fleire pop-låtar skrivne av mellom andre Rolf Løvland. I 1985 vart Løvland invitert av NRK til å skrive eit bidrag til årets norske Melodi Grand Prix og han skreiv «La det swinge» til Bobbysocks som både vann den norske finalen og Eurovision Song Contest 1985 som vart halden i Göteborg.
Dette var fyrste gongen ein norsk artist vann konkurransen og den påfølgjande turnéen i Noreg sette 34 publikumsrekordar og nærare 50 000 menneske møtte fram i Nygårdsparken i Bergen. Jentene turnerte i 16 ulike land, selde fleire millionar plater og var nummer éin på hitlistene i åtte ulike land.
Hanne solo
I 1988 takka Bobbysocks for seg med ein LP innspelt i Los Angeles og Hanne gjekk så i studio med Bjørn Eidsvåg og Håkon Iversen som produsentar. Resultatet vart ei meir lågmælt plate som fekk namnet Hanne. Plata vart kritikarrost og inneheldt songar som «Det er tent et lys» , «Gi meg ikke din styrke» og «Vakker når du sover» .
Just 4 Fun
Tidleg på 90-talet vart ho med i kvartetten Just 4 Fun saman med Eiríkur Hauksson, Marianne Antonsen og Jan Groth. Gruppa spelte 60-talsmusikk og gav ut LP-en Ren 60. Resultatet vart 30 veker på hitlistene, og eit sal på over 50 000 eksemplar. I 1991 representerte dei Noreg i Melodi Grand Prix med låten Mrs. Thompson skriven av Dag Kolsrud.
Ta meg til havet
I 1992 spelte Hanne Krogh inn live-plata Ta meg til havet i heimbyen Haugesund. Plata inneheldt dei største klassikarane hennar, og dessutan fleire nyskrivne låtar. Krogh debuterte her som komponist med låten «Ikke gi deg jente», som handla om hennar eiga bestemor. Rolf Løvland bidrog med «Jeg kan se en stjerne falle», som fleire norske grupper har laga cover-innspeling av i ettertid. Plata fekk Spellemannprisen i 1993, og la grunnlaget for ein turné over heile landet.
Barneplater
Då Hanne Krogh fekk dottera Amalie i 1993, og i samband med dette spelte ho inn viser av Alf Prøysen i arrangement av Pete Knutsen på plata Prøysens barnesanger. Albumet selde over 100 000 eksemplar og vart nominert til Spellemannprisen. Dette bana veg for fleire barneplater.
Tidleg på 1970-talet hadde forfattaren Thorbjørn Egner vald seg ut Hanne Krogh til å gestalte ulike skikkelsar når han skulle regissere musikk-eventyra sine for TV og plate. På slutten av 90-talet tok ho no for seg melodiane hans i Egners barnesanger som etter kvart kom til å selje over 50 000 CD-plater og kassettar. Sist ut i barnemusikk-serien til Kogh var Sanger fra barnas skattkammer i 2002.
Vestavind
Tekstskriving vart ein større del av Krogh si verksemd, særleg rundt temaa utvandringa til Amerika og historiene og mytane mellom Irland, Noreg og Amerika. I 1998 gav ho ut albumet Vestavind, som handla om lengten mot vest. I åra etter har ho gjeve konsertar med fragment frå Vestavind.
Team Hanne
Våren 2009 samla Hanne eit kor frå heimbyen Haugesund for å vere med i TV2-programmet Det store korslaget. «Team Hanne» vann heile konkurransen og dei feira sigeren m.a med ein jubelturné på vestlandet, framferder i USA og CD-utgjevinga Reis meg opp som kom i desember same året. Pengepremien på ein halv million kroner bidrog til å opprette Team Hanne Kulturfond som har som formål å stimulere unge kunstnarar til å utvikle ferdigheiter som kan bidra til å auke den kreative aktiviteten til regionen, oppfordre ungdom til å satse på talentet sitt og styrke den kunstneriske kompetansen på Haugalandet. Fondet deler ut eit årleg stipend på inntil 100 000,- kr til ein talentfull kunstnar under 23 år.
Hannes jul
Heilt sidan slutten av 1980-talet har Krogh turnert landet rundt ved juletid med sine julekonsertar. Ho samarbeider med lokale kor på dei ulike konsertane som kvart år fyllar kyrkjene over heile landet.
Hanne Krogh gjev kvart år rundt 100 konsertar rundt om i landet.
Familie Hanne Krogh er gift med journalisten , og er mor til programleiaren Sverre Krogh Sundbø og skodespelaren Amalie Krogh Sundbø.
Prisar og utmerkingar
Peer Gynt-prisen 1985 Spellemannprisens Heiderspris 1985 Ålesunds-silda 1987 Spellemannprisen 1992 for Ta meg til havet Gammleng-prisen 1993 De Fykende måker - Haugesund Kommunes ærespris 2007
Diskografi 1978: Hanne Krogh 1980: Nærbilde 1982: Alene 1982: Nordens vakreste 1983: Under samme sol 1984: Julens vakreste 1984/1985: Bobbysocks 1986: Waiting for the Morning (Bobbysocks) 1987: Walkin' on Air (Bobbysocks) 1989: Hanne 1990: Ren 60 (Just4Fun) 1991: Those Were the Days (Just4Fun) 1992: Ta meg til havet 1994: 40 beste 1995: Prøysens barnesanger 1996: Julestjerner 1997: Reisen til den levende parken 1998: Vestavind 1999: Egners barnesanger 2000: God jul - Hannes beste julesanger 2002: Sanger fra barnas skattkammer 2002: Ved juletid 2006: God jul - Hannes beste julesanger (nyutgjeving) 2010: Let It Swing – The Best of Bobbysocks 2011: Vår julekonsert (Hanne og Tre Tenorer) 2012: Barnas nasjonalskatt 2013: Ikke gi deg, jente
Kjelder
Denne artikkelen bygger på «Hanne Krogh» frå , den 26. september 2010.
Kategori:Norske songarar Kategori:Folk frå Haugesund Kategori:Vinnarar av Spellemannprisen Kategori:Norske Skal vi danse-deltakarar Kategori:Allsang på grensen Kategori:Melodi Grand Prix 1985-deltakarar Kategori:Melodi Grand Prix-vinnarar Kategori:Norske Eurovision Song Contest-deltakarar Kategori:Eurovision Song Contest-vinnarar Kategori:Eurovision Song Contest 1985-deltakarar Kategori:Eurovision Song Contest 1991-deltakarar Kategori:Eurovision Song Contest 1987-låtskrivarar Kategori:Norske Eurovision Song Contest-låtskrivarar Kategori:Melodi Grand Prix 1987-låtskrivarar Kategori:Melodi Grand Prix-vinnarlåtskrivarar